सानीभेरी डेस्क रुकुम पश्चिमको मुसिकोट खलंगामा पूर्णिमाको अवसरमा लाग्ने पाँच पूर्णिमा मेला आज लागेको छ ।
परम्परागत रूपमा खलङ्गाको बराहटाकुरामा लाग्दै आएको मेला यस वर्ष भव्य रूपमा मेला लागेको हो ।
मेलालाई भव्य बनाउनका लागि मेला सञ्चालन तथा व्यवस्थापन समिति गठन गरिएको थियो । उक्त समितिले मेलाको प्रचारप्रसार देखि मेलामा सहभागी नाच समूहलाई पुरस्कृत गर्न तथा मेला सञ्चालनका लागि सहयोग सङ्कलन लगायत व्यवस्थापनका कामहरू गरेको थियो ।
प्रतिकुल मौसमका बाबजुद पनि मुसिकोटका विभिन्न वडाबाट नाच समूहहरू खलङ्गामा पुगेका थिए भने मेला अवलोकनका लागि गाउँ गाउँबाट मानिसहरू खलङ्गा पुगेका थिए ।
मेलामा विभिन्न १३ वटा नाच समूहले सहभागिता जनाउँदै नाच देखाएका थिए । ७ वटा पैँसेरु नाच, २ वटा मयुर नाच तथा सिँगारु नाच, पञ्चेबाजा नाच, लाखे नाच र सोरठी नाच १/१ वटा सहभागी थिए ।
साथै सबै नाच समूहलाई नगद ७ हजार सहित पुरस्कृत गरिएको र सबै समूहलाई प्रमाणपत्र समेत प्रदान गरिएको मेला सञ्चालन तथा व्यवस्थापन समितिका संयोजक हेमराज श्रेष्ठले जानकारी दिनुभयो ।
लोप हुँदै गएकाे पाँच पूर्णिमा मेला संरक्षणका लागि सहयोग सङ्कलन गरेर मेला व्यवस्थापन गरिएको समितिले जनाएको छ ।
